Aralarrek “murritzailetzat” jo ditu 2011rako Jaurlaritzak aurkeztutako aurrekontuak

“Gobernu kontseilutik pasa aurretik PPren galbahea pasa dute aurrekontuek; beraz, gobernuan egon ez arren, alderdi popularraren zigiluarekin datozen aurrekontu murritzaileen aurrean gaude”. Hala iritzi dio Aralarren bozeramaile Aintzane Ezenarrok, Agirre sailburuak aurkeztutako aurrekontu proiektuari. “Jaurlaritzak bateragarri egin nahi ditu ekonomiaren bultzada eta babes politikari eustea, baina hori bateraezina da”, leporatu dio Ezenarro Agirreri. “Murrizketarako aurrekontuak aurkeztu ditu gobernuak eta horrela ezinezkoa da bermatzea babes soziala; are gutxiago departamendu guztietako diru partidak jaitsi direnean. Inbertsioak ere jaitsi egiten dira bai Osakidetzaren kontratu programari dagokionez zein funtzio publikoan, ordezkapenetarako murrizketekin”, azaldu du Ezenarrok. “Politika horrek kalitatezko lana suntsitzea dakar, izan ere, onartutako murrizketen artean ordezkapenak murrizteko erabakia dago, beraz, funtzio publikoan langile gutxiago izatea dakar, hau da, kalitatezko lana galtzea da”.

Aralarren bozeramaileak gobernuak iragarritako BPGren igoera eta enplegua sortzeko aurreikuspenak zertan oinarritzen dituen azaltzeko eskatu dio Ekonomia sailburuari, “ez baita argi geratzen zertan oinarritzen diren aurreikuspen horiek. Are gehiago, II eta IV kapituluetan egindako murrizketek zenbateko aurreztea suposatzen duen argitzen ez denean”.

Bestalde, Mikel Basabe Hezkuntza batzordeko kideak, aurrekontuen murrizketen ildotik, “harrigarritzat” jo du Celaa sailburuak aurkeztu dituen kontuak. Izan ere, “2010eko aurrekontuetan 4.000.000 euroko partida berri bat sartu bazen, eskola pribatuetako A ereduetako itunak beste ereduetako itunekin parekatzeko, 2011ko aurrekontuetan bikoiztu egin da diru partida hori. Dagoeneko 8 milioi eurokoa dela”. “Gauza jakina da A ereduak ez duela balio erkidego honetako hizkuntza ofizial biak jakiteko, eta gauza jakina da eskola publikoan bazter-gune bihurtzen ari dela. Baina aurten 8 milioi bideratu dituzte PP-PSOEren teoria ei dena betetzeko balio ez duen hizkuntz ereduarentzat. Hala, parean ordainduko ei dituzte ereduak, hizkuntzak ikasteko balio zein ez, gizarte kohesiorako balio zein ez”.

Halaber, Basabek salatu egin du sistema euskalduntzeko diru gutxiago dagoela aurten, eta jaitsi egiten dela ikastetxe pribatuetan hizkuntza normalizaziorako diru kopurua.