Hemen zaude: Hasiera › Aktualitatea › Albisteak › Aralar beldur da, ETB Nafarroan LTDren bitartez ikusterik egongo ez delako

Aralar beldur da, ETB Nafarroan LTDren bitartez ikusterik egongo ez delako

2011/06/30
  • etb
  • basabe
  • nafarroa
  • ltd
Aralarren legebiltzar taldeak ETB Nafarroan LTD bidez ikus dadin ekimena aurkeztu du gaurko plenoan, baina sozialistek eta popularrek uko egin diote ekimena babesteari. “Beste behin, Legebiltzarrak ez du aintzat hartuko Nafarroako Parlamentuak iaz eskaturikoa, alegia, ETBren kateak Nafarroan LTDren bitartez ikusterik egon dadila”, salatu du Mikel Basabe Aralarren legebiltzarkideak. “Urte bi igaro dira Nafarroako eta EAEko gobernuek ituna sinatu zutenetik, eta oraindino ez da bete. Ematen du, gainera, beste urte bi emango ditugula ituna betetzeke, Nafarroako gobernu berrian sozialistak ere badauden arren”, adierazi du Basabek.

Nafarroako sozialistek eskaturikoaren kontra jo dute PSEkoek eta egoera luzatu egingo dela ematen du, “ETB Nafarroan LTDren bitartez ikusteko erabakiari epeak jartzearen kontrako jarrera azaldu duelako bozeramaile sozialistak osoko bilkuran, eta hori arduratzekoa da”, azaldu du Aralarren legebiltzarkideak. 2009an sinatu zuten Lopezen eta Sanzen gobernuek ETB Nafarroan LTD bitartez ikusteko akordioa, baina harrezkero ez dute inongo neurririk hartu hori gauzatzeko. Basaberen esanetan, “ETB Nafarroan LTDren bitartez ikusterik izatea ez da bakarrik Nafarroaren eta euskararen onerako; EiTBren onerako ere bada”; ildo horretan, Basabek gogoratu du, gainera, EITBko zuzendari nagusiak “estrategikotzat” jo zuela ETB Nafarroan era digitalean ikusi ahal izatea. “Aldiz, bera karguan jarri zuen gobernuak eta berau sustengatzen duten taldeak ez dira iritzi berekoak, eta argi geratu da, gainera, ez dutela inolako asmorik jarrera aldatu eta kargura iritsi zirenean emandako hitzarekin betetzeko”, gehitu du Aralarreko legebiltzarkideak. “Gauzak honela, berriro ere ekarri beharko dugu proposamena Legebiltzar honetara, aurreikus baitaiteke ETB ez dela Nafarroan LTDren bitartez ikusterik izango”.