Akordio politiko eta sozialaren oinarriak

Betiko legez, Nafarroan XXI. mendean bizi dugun debate politiko eta sozialaren oinarrian bi elementu daude: dialektika gaurkotu da, baina segurtasuna eta askatasunaren arteko dialektika izaten jarraitzen du. Demokraziak sendoak eta iraunkorrak izan ohi dira, baldin eta askatasunaren aldeko hautua egiten badute eta gizartea elementu horren arabera antolatzen badute. Horixe da hain zuzen ere, 1949an argitaratu zen giza eskubideen aldarrikapenaren mezu nagusia, eta baita 1950eko Giza Eskubideen Hitzarmenarena.

ARALARREK hurrengo hausnarketa egin du: ezin daiteke inondik inora, akordio politiko eta sozialik burutu baldin eta akordio horren oinarrian eskubideen urraketak jasotzen badira, mendekua sustatzen bada, errepresioa lantzen bada edo aipatu akordioa batzuen eta besteen artean berdintasun ezan oinarrituta badago.

Nafarroan lortu daitekeen akordioa demokratikoak hiru zutabe izan behar ditu:

    1. Pluraltasuna edo aniztasuna aintzat hartzea eta balioestea.     

    2. Pertsona guztientzako eskubide ororen errekonozimendua.     

    3. Biktima eta sufrimentu guztiekiko elkartasuna.

Aniztasuna da hain zuzen ere, demokrazioaren oinarria, eta baita XXI. mendeko gizartearen ezaugarri nagusia. Aniztasuna da etorkizunaren ezaugarria. Gizarteak duen aberstasunaren adierazgarria den moduan. Aniztasun ideologikoa, politikoa, erlijiosoa, linguistikoa, etab. Gainera, Nafarroaren historian errepikatu den adierazgarri garrantzitsuenetako bat da, momentu batzuetan, aniztasun hori zokoratua, aurre-epaitua eta jazartua izan den arren.

Koherentziaren izenean, aniztasuna, lehendabizi aintzat hartu behar da, errekonozitu behar da; jarraian, askatasunetik heldu behar zaio. Giza eskubideen defentsa zilegia izan dadin, bazterketarik gabe egin behar da. Bizitza eta pertsonen integritatea askatasunetik defendatu behar da, eta baita gizaki ororentzat eskubide sozial eta politiko guztiak aintzat hartuz.

Koherentzia horren ildoak, ETAren, GALen, BVEn (Batallon Vasco Español) edo Segurtasun Indarrek eragindako biktima ororen sufrimenduarekiko elkartasuna izatera eramaten gaitu.

Eusko Legebiltzarrean aurreko legegintzaldian onartu zen Biktimekiko Elkartasunaren legeak, lehenengo aldiz batzen ditu textu berean ETAren, GALen eta BVEn biktimak. Gainera, barneratu ez ziren arren, Estatuaren Segurtasun Indarrek eragindako biktimak ere etorkizunean aintzat hartzeko akordioa lortu zen. Estrasburgoko auzitegiak Mikel Iribarrenen kasuan egindako epaian, aipatu talde guztiek eragindako biktimak batzeko oinarriak jartzen dira. Gainera, Nafarroan ezin ditugu ahaztu Guda Zibilak eragindako sufrimendua, orain dela 73 urte jasotako gertaerak izan arren, gaur egun zenbait ondorio bizi ditugulako.

Horixe izango da Aralarrek debate sozial eta politikoaren inguruan egingo dituen ekimenen zirriborroa, horixe delako gizarteak elkarbizitzaren, giza eskubideen eta politikoen aurrean eskatzen diguna. Ildo horretatik lan egingo dugu Nafarroa Bairen baitan.