Abertzaleen Batasunarekin lehentasuneko harremana berretsi du Aralarren Hegoaldeko Batzarrak

“Abertzaleak gara eta Euskal Herriko arazo guztiak gureak dira, ez zaizkigu arrotzak. Ez gaude Iparraldean hedatuta, baina Iparraldeko arazoak, kezkak eta helburu politikoek gu arduratzen gaituzte. Abertzaleen Batasunekoak arduratuta dauden bezala Hegoaldeko arazoekin, Nafarroako arazoekin edo EAEko arazoekin. Horregatik, Abertzaleen Batasunarekin beste urrats bat eman nahi izan dugu gaur: lehentasunezko harremanak aitortzeaz gainera, erakunde iraunkorra sortzeko baimena eskatu diogu gure Hegoaldeko Asanbladari, eta aho batez eman digu”, esan du.

Zabaletak azpimarratu duenez, “bakea da Aralarren lehendabiziko kezka eta bakea da gure lanaren lehendabiziko helburua”. “Baina zein bake?”, gaineratu du. “Euskaldunon bakea, euskal bakea. Horixe da Aralarrek duen aurreneko kezka, ardura eta xedea. Euskal Herriak bakea nahi eta behar du, eta premiaren premiaz aldarrikatzen dugu”. Aralarreko koordinatzailearen hitzetan, “Inork ez digu bakea oparituko, askatasuna eta justizia oparitzen ez diren bezalaxe. Bakea ere ez da oparitzen; irabazi egin behar da bakea, norberak irabazi behar du, Euskal Herriak irabazi behar du, guk geuk, euskaldunok, irabazi egin behar dugu. Guk egin behar baitugu herri honetako bakea, euskaldunok”.

Zentzu horretan, mezu zehatza helarazi dio ETA erakundeari: “ETA erakundeak Euskal Herriari zor dio bakea, Euskal Herriari eman behar dio bakea. Eta eman behar dion bakea euskaldunon bakea da, euskal bakea da”.

Aralarren Hegoaldeko Batzarrean hitz egin da Euskal Herriko eguneroko arazoetaz ere: langabeziaz, ingurumenaz, etorkizunaz, eta nola ez, eginkizun politikoez. Nafarroa Baiz ere bai. Azken egunetan “aurrerapausoak” eman direla aitortu du Zabaletak “Guretzat Nafarroa Bai aukera tinkoa da. Nafarroa Bai bai edo bai. Hori da gure xedea eta gure asmoa”.

“Baina Nafarroa Baik eraikuntza politiko duin orok bezala, oinak tinkoak, sendoak eta irmoak behar ditu”, azpimarratu du Aralarreko koordinatzaileak. “Lehendabizi ideien mailako adostasuna. Hori da egin beharrekoa politikoan bide zuzenak egiteko. Bigarrena, egitarauak eta egitasmoa adostu, eta jakin zertarako elkartzen garen, zein diren helburu nagusiak eta zein bideak. Hirugarrenik, egiturak, jardunak, funtzionamenduak, argiak, garbiak eta demokratikoa izan dadin”.

Zabaletak azaldu duenez, “hiru urrats horiek ematen ari gara, beste indar politiko guztiekin hitz egiten ari gara, ateak ireki nahi dizkiegu gizarteari eta beste eragile politikoei ere. Eta Nafarroan lehendabiziko indarra izan daitekeena izango du Aralarren aldetik aukera eta bultzapena”.