EREgeen 47 opari
47 kaleratze. Horixe onartu du gaur Nafarroako Gobernuak Berako Funvera enpresan. Orain urtebete 202 langile zituen enpresak, 100 langilerekin hasiko du urtea, eta EREan jarraituko dute horiek guztiek, gainera.
55 kaleratze proposatu zituen enpresak. Abenduaren 2az geroztik mugagabeko greban dira enpresako langileak, kaleratze horiek salatzeko. Abenduaren 30ean Nafarroako Parlamentuan izan ziren, Nafarroa Bairen eskariz, euren egoeraren berri emateko. Talde parlamentari guztiek aitortu zuten justifikaziorik gabeko kaleratzeak zirela. Roig Industria Sailburuak, baina, egun bat beranduago sinatu zuen 47 kaleratzeak onartzen dituen EREa.
Funverak, 2003 eta 2008 urteen artean, 11,3 milioi eurotako irabaziak izan ditu. Nafarroako Gobernuak milioika eurotako dirutza inbertitu du azken urteotan enpresa honetan. Eta orain, bide berdea eman dio enpresari kaleratze masiboak egiteko.
Baztan-Bidasoa eskualdea da, Sakanarekin batera, krisiak gogorren astindu duen eskualdea. Nafarroako Gobernuak ez du xentimo bakar bat ere inbertitu azken urteetan eskualdean lanpostuak sortzeko. Eta badirudi, asmorik ere ez duela lanpostuak sortzeko inolako neurririk hartzeko.
Elkartasuna eta berotasuna Funverako langileei. Animorik beroena. Borrokaren segitu behar dugu, eskualdeak behar du eta.
