Herritarrek Ertzaintzarekin euskaraz jarduteko eskubidea nola bermatuko duen galdegin dio Aralarren Aresi

Aralarren legebiltzarkide Mikel Basabek prentsaurrekoan azaldu du Herrizaingo sailburuari interpelazioa egiteko arrazoiak. Berak azaldu duenez, "gauza jakina da lege ordenamenduak bermatu egiten duela Euskal Autonomia Erkidegoko herritarrek administrazioarekin dituzten ahozko zein idatzizko harremanetan ofizial diren hizkuntzen artean aukeratzeko eskubidea dutela. Hori segurtatzeko lana bete behar dute Euskal Autonomia Erkidegoko administrazioek, baita Eusko Jaurlaritzak ere, beraz".

Basaberen hitzetan, "gauza jakina da baita ere administrazioaren esparru batzuetan aurrerakada nabarmena eman dela eskubide hori bermatze aldera, eta gaur egun duela hogeita zazpi urte (Euskararen erabileraren normalizazioa arautzen duen 10/82 Legea onartu zenetik) baino askoz egoera hobean gaudela. Hala ere, hizkuntza aukeratzeko eskubide hori gauzatu ahal izatea oso gaitza edo ezinezkoa da zenbait administrazio ataletan. Horien artean dago, zalantzarik gabe, Ertzaintza".  

Hil honetan bertan, Laneko eskaintza Publiko berria egin du Eusko Jaurlaritzak Ertzaintzarako. Horietan, erdiak ere ez dira hizkuntza-eskakizuna ezarririk duten lanpostuak, guztiek ere 1. hizkuntza-eskakizuna, Kontseiluak jendaurrera ekarri duen legez. Aralarren irudikoz, kopuru hori txikiegia da, "batez ere kontuan izanik dagoeneko lanean ari diren ertzainen artean administrazio orokorreko langileen artekoa baino txikiagoa dela hizkuntza ofizial biak dakizkiten elebidunen kopurua. Bestetik, nekez uler daiteke ahozko nahiz idatzizko harremanak hizkuntza ofizialetako edozeinetan bermatzen ez duen Ertzaintzan 2. hizkuntza-eskakizunik ez ezartzea ez ertzain berrientzat, ezta dagoeneko lanean ari direnentzat ere".

Gogora ekarri behar da Aralarrek jendaurreko lanpostuak pertsona elebidunez (alegia, euskara eta gaztelania dakizkitenak) hornitzea proposatu zuela aurreko legealdian, eta "proposamen berbera egin beharrean gaude gaur egun ere, horixe baita hizkuntza aukeratzeko eskubidea bermatzeko bidea". Hori dela eta,  Herrizaingo sailburu Rodolfo Aresi interpelazioa egingo dio Aralarrek galdetzeko, zelan lortu gura du Barne sailak herritarrok administrazioarekin ahozko zein idatzizko harremanetan hizkuntza ofiziala aukeratzeko dugun eskubidea Ertzaintzarekiko harremanetan ere bermatzea, herritarroi aparteko enbarazurik edo tramiteetan luzamendurik eragin gabe?".