Aralarrek dio Estrasburgoko Auzitegiaren epaia demokrazia murriztailea dela

Aralarreko koordinatzaileak azpimarratu duenez, “Rubalcabak esaten duenaren kontra, segurtasuna askatasunaren gainetik kokatzen edo lehenesten den aldioro, ideiak zigortzeko bidea irekitzen da”. “Estatu batek bere neurri politikoen defentsan segurtasunaren gabezia edo beldur soziala argudio bezala erabiltzen dituenean askatasunak murrizteko, Espainiak egiten duen bezala”, gaineratu du Zabaletak, “agerian uzten du bigarren mailako estatua dela, heldutasun falta, askatasuna kudeatzeko gaitasun falta eta aurrerantzean gizabanakoen askatasun bideak bermatzeko erantzukizunik ez duela hartzen bere gain”.

Zabaletak adierazi duenez, “demokrazia heldu, sendo eta garatu batek bere ezaugarritzat dauka askatasun guztiak bermatu ahal izatea eta hori egitea, gainera, segurtasuna ahaztu gabe. Ezin dugu ahaztu diktadura guztien lelo nagusia segurtasuna eta ordena bermatzea eta beste edozein eskubideren aurretik aitzineratzea izaten dela”.

Zabaletak nabarmendu du Europak munduari erakutsi behar diola irudi demokratikoa eta adibide sozialak, “baina horrek eskatzen du askatasun demokratikoak eta giza eskubideak ezin murriztu izatea inoiz eta inola, Giza Eskubideen Adierazpenak (Paris, 1948) esaten duen moduan. Europak demokrazian autoritatea izan behar du, aginte soilaren gainetik, eta horretan Estrasburgoko Auzitegiak zeregin berezia du, eta epai honetan ez du bete”.

Hari horretara, Zabaletak agertu du epaia atzerakoia eta kontserbadorea dela, “eta neurri batean arriskutsua, etorkizunean etor daitezkeen beste sententzia atzerakoi batzuei bidea irekitzen dielako”.

Hala ere, eta etxeko sukaldera begiratuz, Aralarrek, ezker abertzaleko ildo bezala, dei egin die ezker abertzaleko beste sentsibilitate eta herritar guztiei “estatuari aitzakiak kentzera eta bide politikoen apustu tinkoa azkar egitera. Dei egiten diegu ETAri eska diezaioten bere jarduna etetea, eta horren bitartez, elkarrizketa bideratzeko, indarkeriaren ondorio guztiak gainditu aldera”.