Aralarrek dio Estrasburgoko Auzitegia Batasunaren legez kanporatzearen alde agertu izana demokraziarentzat berri txarra dela

Aralarrek bere elkartasuna agertu nahi die legez kanporatutako alderdiarekin bat egiten duten milaka herritarrei. Zabaletak azpimarratu duenez, “Aralarretik beharrezkoa ikusten dugu milaka herritarren babesa duen alderdi baten legalizazioa, besteak beste, ez dagoelako herritar ilegalik”.

Hari horretara, Aralarreko koordinatzaileak Alderdien Legea bertan behera uztea exijitu du, “guztiz antidemokratikoa delako”.

Aralarren ustez, demokraziaren mugak Zigor Kodeak ezarri behar ditu. “Zigor Kodea da bai bilakaera edo garapen sozialetan nola bilakaera eta garapen demokratikoetan azken mugak adierazi behar dituena demokrazia heldu batean”.

Bestalde, Zabaletak azpimarratu duenez, “Aralarrek ez du bat egiten askatasunaren murrizpena eta herritar askoren borondatea ezin adierazia dakarren epai bat txalotuko dutenekin, eta askoz gutxiago askatasuna gero eta gehiago murrizten ahalegintzeko horrelako epai baten oinarritu nahi izango dutenekin”.

Estrasburgoko Auzitegiaren erabakiaren edukia ezagutzen duenean, ebazpenaren balorazio sakonagoa egingo du Aralarrek.