“Atzerakoia da EAJk eta EAk hizkuntza ereduez PSErekin eta PPrekin sinatu duten proposamena”

Horregatik, Basabek ez du ulertzen “zergatik tematzen diren batzuek aldaketak egiten argi dagoenean gizarteak bere borondatez, gurasoen erabaki librez, D ereduaren aldeko apustua egiten duela, hizkuntza bien ezagutzaren aldeko apustua”. “Gaur onartuko proposamenak Hezkuntza Sailari eskatzen dio “benetan” bermatu dezala gurasoek hizkuntza eredua aukeratzeko askatasuna izango dutela, “iradokiz orain arte aukera hori ez dagoela eta erabat kanpoan utziz gurasoen eskubide hori beste eskubide batekin uztartu behar dela, hau da, ikasleek euskal herritar diren aldetik hizkuntza biak jakiteko duten eskubidea”, gehitu du Aralarren parlametariak.

Aralarren ordezkariak adierazi du “16 urterekin ofizialak diren hizkuntza biak jakitea bilatzen ari bagara bidea ezarrita” dagoela eta “gurasoak jakitun dira eta, jakitun direnez, aukeratu egiten dute”. “Inposatzen den hizkuntza bakarra gaztelania da, hala agintzen du konstituzioak bere 3. artikuluan” gehitu du Basabek. “Ez dut ulertzen EAJren eta EAren jarrera, hemen onartu dena atzerapausoa delako”, iritzi dio Aralarren ordezkariak. “Ez dezagun ahaztu euskal gizartearen atzetik goazela, euskal gizarteak badakiela bere seme-alabentzat hizkuntza ofizial biak gura dituela, badakiela ze ereduk jartzen duen horretarako bidea eta urterik urtera egiten du horren aldeko aukera. Garbi esan dezagun: aldaketak, izatekotan, okerrerako proposatuko dira”.